Da obra de Roald Dahl destaca a producida para o goce dos nenos: Matilda, Los Gremlins, Las brujas, Charlie y la fábrica de chocolate, Cuentos en verso para niños perversos… Aínda que escribiu novelas, biografías e tivo unha gran relación co cinema xa que traballou como guionista, o conto é, sen dúbida, o formato literario no que conseguiu plasmar toda a súa imaxinación, destreza e xenio.

Este espectáculo céntrase en dous dos seus máis curiosos contos: "Desexo" (The Wish) e "Cordeiro asado" (Lamb to the slaughter).

A música desenvólvese ao redor dun mesmo material compositivo. En "Desexo" glosa o texto desde o punto de vista da mente do protagonista e convértese na súa propia voz. E en "Cordeiro asado" funciona emulando as bandas sonoras do cinema dos 50-60, está nun segundo plano, case exclusivamente decorando ou ambientando a acción.

As imaxes iluminan a escena nun sentido real e metafórico, axudan a reflexionar sobre os múltiples niveis de significado dos contos. Crean conexións imaxinativas, suxiren conceptos: infancia, desexo, impulso, frustración, instinto… fan despegar o voo imaxinativo dos espectadores. Funciona á inversa da música en "Desexo" a imaxe é segundo plano, marco de referencia mentres en "Cordeiro asado" protagoniza a acción e abre perspectivas.